سەرۆکوەزیرانی عێراق جەختی لە پاڵپشتیی بەغدا بۆ سەقامگیریی لوبنان کردەوە بە مەبەستی زاڵ بوون بە سەر کێشە و گرفتەکانی دا.

بەگوێرەی ڕاپۆرتی هەواڵدەریی تەسنیم،«محەممەد شیاع سودانی»سەرۆکوەزیرانی عێراق ڕۆژی هەینی لە پەراوێزی سی و دووهەمین کۆبوونەوەی لوتکەی عەرەبی لە شاری جەددەی عەرەبستان لەگەڵ «نەجیب میقاتی» سەرۆک وەزیرانی لوبنان کۆبووەوە و ڕێگاکانی پتەوکردنی هاوکارییەکانی عێراق و لوبنان و پەرەپێدانی هاوبەشییەکانی ھەردووک وڵاتیان لە بواری جۆربەجۆردا شی کردەوە.

هەر لەم دیدارەدا «نەجیب میقاتی» پاڵپشتیی عێراقی بۆ حکومەت و گەلی لوبنان و بەردەوامیی دابینکردنی سووتەمەنی بەرز نرخاند.

میقاتی وتیشی: ئەمڕۆ عێراق لە ھێڵی پێشەوەی ئەو وڵاتە عەرەبیانەیە کە پاڵپشتیی لوبنان دەکەن لە تێپەڕاندنی قەیرانەکان و چەسپێندرانی سەقام لەو وڵاتەدا.