کۆنترۆڵی بنکەی ئەمریکایی عەینولئەسەد دەدرێتە دەستی عێراق
ڕاوێژکاری سەرۆک وەزیرانی عێراق پێیداگرت کە هێزە چەکدارەکانی ئەم وڵاتە لە چەند ڕۆژی داهاتوودا کۆنترۆڵی بنکەی سەربازیی ئەمریکا لە عەینولئەسەد دەگرنە دەست.
حسێن عەلاوی، ڕاوێژکاری سەرۆک وەزیرانی عێراق ڕایگەیاند: دوای ئەوەی حکومەتی عێراق لەگەڵ ئەمریکا ڕێککەوتن لەسەر کۆتاییهێنان بە ئەرکەکانی هێزەکانی ئەمریکا لە مانگی سێپتەمبەری ٢٠٢٤، بە پشتبەستن بە بەیاننامەیەکی هاوبەش، جێبەجێکردنی ئەم بڕیارە لە مانگی سێپتەمبەری ٢٠٢٥ دەستیپێکرد و فەرمانبەرێتییەکان کۆتاییان هات. حسێن عەلاوی ڕوونیشیکردەوە: دوای کۆتاییهاتنی فەرمانبەرێتییەکان و کشانەوەی هێزەکانی ئەمریکا لە چەند ڕۆژی داهاتوودا، هێزە چەکدارەکانی عێراق لە سەرەتای ساڵی ٢٠٢٦ـەوە بارەگای ئەو هێزانەیان لە بنکەی عەینولئەسەد لە پارێزگای ئەنبار ڕادەست دەکرێ. ڕاوێژکاری سەرۆک وەزیرانی عێراق وتیشی: ئەم کارە لە چوارچێوەی کۆتایی هاتنی فەرمانبەرێتییەکان و بەرزکردنەوەی پەیوەندییەکان بۆ ئاستێکی دوولایەنە جێبەجی دەکرێ و هەوڵ دەدرێ تەبایینامەگەلێک سەبارەت بە هاوکاریی هاوبەش لە بواری ئەمنیدا بە ئامانجی بەهێزکردنی هاوکاری لە بەرەنگاربوونەوەی تیرۆر لە ڕێگەی بەهێزکردن و ئاڵوگۆڕی ئەزموونەکان و ئەنجامدانی مەشقی هاوبەش، واژۆ بکرێ.حسێن عەللاوی ڕاشیگەیاند: کشانەوەی هێزەکانی ئەمریکا لە عێراق کۆتایی دێنێ بە قۆناغێکی گەورەی پرۆسەی شەڕی دژ بە گروپە تیرۆریستیی داعش، کە بۆ ماوەی یازدە ساڵ بە هاوکاری و هەماهەنگی بەردەوام بوو بۆ ڕزگارکردنی بەشێک لە پارێزگاکانی عێراق لە چنگی تیرۆر و لەئاکامیشدا لەلایەن هێزە چەکدارەکانی عێراقەوە لە ماوەی ساڵانی ٢٠١٤ تا ٢٠١٧ شکستی پێهێندرا.
