یونیسێف: لەو کاتەوەی پەلاماردرانی غەززە دەستپێکراوەتەوە، ٣٢٢ منداڵی فەلەستینی کوژراون
سندووقی منداڵانی ڕێکخراوی نەتەوە یەکگرتووەکان (یونیسێف) لەو کاتەوەی ژینۆسایدی ڕژێمی زایۆنی دژی فەلەستینییەکان لە کەرتی غەززە لە ١٨ی مارسەوە دەست پێ بۆتەوە تا ئێستا ٣٢٢ منداڵی فەلەستینی شەهید بوون و ٦٠٩ کەسی دیکەش بریندار بوون.
یونیسێف ڕایگەیاندووە، لە ١٠ ڕۆژی ڕابردوودا، مامناوەندی ژماری گیانلەدەستدان و برینداربوونی منداڵان لە غەززە نزیکەی ١٠٠ منداڵ بووە لە ڕۆژێکدا. ئەم ئامارە ئەو منداڵانە دەگرێتەوە کە لە پەلامارەکەی ڕۆژی ٢٣ی مارسی سوپای داگیرکەر بۆ سەر بەشی نەشتەرگەری نەخۆشخانەی "ناسر" لە باشووری شاری غەززە گیانیان لەدەستداوە.
کاترین ڕاسڵ بەڕێوەبەری بەشی کارگێڕیی یونیسێف ڕایگەیاند، ئاگربڕ لە غەززە هەلێکی هەرەگرینگ بوو بۆ پاراستنی گیانی منداڵانی غەززە، بەڵام ئێستا جارێکی دیکە کەوتوونەتە ناخی چەرخەیەکی هەژاری و توندوتیژیی مەرگهێن.
یونیسێف ڕایگەیاندووە کە لە ماوەی ١٨ مانگی پەلامارەکانی ئیسراییل بۆ سەر غەززە زیاتر لە ١٥ هەزار منداڵ شەهید بوون و زیاتر لە ٣٤ هەزار منداڵیش بریندار بوون، هەروەها نزیکەی یەک ملیۆن منداڵی فەلەستینیش چەندین جار ئاوارە بوونە.
