لە پەلاماری ڕژێمی زایۆنی بۆ سەر کلینیکی ئانڕوا دەیان کەس شەهید و بریندار بوون
ژێدەرە میدیاییەکان باسی پەلاماری جەنایەتکارانەی ڕژێمی زایۆنی بۆ سەر کلینیکێکی ئانڕوا لە باکووری کەرتی غەززە و شەهید و برینداربوونی دەیان کەس، لەوانە چەند منداڵێکیان کرد.
میدیا فەلەستینییەکان ڕایانگەیاندووە کە ڕژێمی زایۆنی لە پەلاماری تازەیدا کلینیکێکی سەر بە ناوەندی فریاگوزاری و کاردانەوەی نەتەوە یەکگرتووەکان بۆ ئاوارە فەلەستینییەکان (ئانڕوا)ی لە ئۆردووگای جەبالیا هەڵکەوتوو لە باکووری کەرتی غەززە، کە شوێنی نیشتەجێبوونی ئاوارە فەلەستینییەکانە، بۆردومان کردووە. وەزارەتی تەندروستی فەلەستین لە کەرتی غەززە ڕایگەیاند: ئەم ناوەندە کە پەناگایەک بوو بۆ ئاوارە فەلەستینییەکان، بەهۆی ئەم پەلامارەوە وێران بووە و ١٩ کەس، لەوانە ٩ منداڵ، لەم پەلامارەدا شەهید بوون.وەزیری شەڕی ڕژێمی زایۆنی ئەمڕۆ باسی پەرەپێدانی هەڵمەتە سەربازییەکانی لە کەرتی غەززە کرد. یەسرایل کاتس، وەزیری شەڕی ڕژێمی زایۆنی لە بەیاننامەیەکدا ڕایگەیاند: ناوچەگەلێکی بەر بڵاو لە کەرتی غەززە دەستیان بەسەردا دەگیرێت و پەیوەست دەکرێن بە ناوچە ئاسایشییەکانی ئیسراییلەوە. ناوبراو هەروەها جەختی کرد کە ژمارەیەکی زۆر لە فەلەستینییەکان لەو ناوچانە دەبرێنە دەرەوە. هاوکات کۆمیتەی بنەماڵەکانی دەستبەسەرکراوانی زایۆنی لە غەززە بە ڕەخنەگرتن لە سیاسەتە جەنگییەکانی ڕژێمی زایۆنی ڕایگەیاند کە ئەم ڕژێمە لە جیاتی ئەوەی هەوڵ بدات بۆ ڕێککەوتن لەسەر مامەڵەی دیلبەدیل و کۆتایی هێنان بە شەڕ، تەرکیزی کردۆتە سەر بەڕێکردنی هێزی زیاتر بەرەو غەززە.
