نالەبار بوونی دۆخی مرۆیی لە کەرتی غەززە؛ 66 شەهید و 345 بریندار لە ماوەی بیست و چوار کاتژمێردا
ڕاپۆرتە فەرمییەکان لە غەززەوە ئاماژە بەوە دەکەن کە کۆمەڵکوژی فەلەستینیەکان و برسێتی لە لایەن زایونییەکانەوە لە ناوچەکەدا بەردەوامە؛ لە ماوەی ٢٤ کاتژمێری ڕابردوودا دەیان فەلەستینی دیکە لە بۆردومان و تەقەی سوپای ڕژێمی زایونی گیانیان لەدەست داوە و سەدان کەسیش بریندار بوون
. وەزارەتی تەندروستی غەززە ڕایگەیاند، لە ماوەی ٢٤ کاتژمێری ڕابردوودا ٦٦ شەهید و ٣٤٥ بریندار بۆ نەخۆشخانەکانی ناوچەکە گواستراونەتەوە. لە درێژەی ئەو پەلامارانەدا ، فڕۆکە جەنگییەکانی ڕژێمی زایۆنی، کومەڵێک لە خێوەتی ئاوارەکانیان لە نزیک مزگەوتی ئەبوبەکر صدیق لە گەڕەکی ئەلنەسر کە دەکەوێتە ڕۆژئاوای شاری غەززە بۆردومان کرد و لانیکەم ١٢ شەهید و ژمارەیەکی دیکەش بریندار بوون. لە دەسپێکی پەلامارەکانی ڕژێمی زایۆنی لە ٧ی ئوکتوبری ساڵی ٢٠٢٣ ەوە تا ئێستا ژمارەی شەهیدان گەیشتووەتە ٦٣ هەزار و ٣٧١ کەس و ژمارەی بریندارەکانیش گەیشتووەتە زیاتر لە ١٥٩ هەزار و ٨٣٥ کەس. لە ماوەی ٢٤ کاتژمێری ڕابردوودا، ١٥ فەلەستینی دیکە لە ڕیزی وەرگرتنی یارمەتی خۆراکی لە کەرتی غەززە شەهید بوونە و ٢٠٦ کەسی دیکەش بریندار بوون، بەمەش کۆی شەهیدانی ناسراو بە "شەهیدانی پاروویەک نان " گەیشتووەتە ٢ هەزار و ٢١٨ کەس و ژمارەی بریندارانی ئەم گرووپە گەیشتووەتە زیاتر لە ١٦ هەزار و ٤٣٤ کەس. کۆمەڵەی فریاگوزاری پزیشکی لە غەززە ڕایگەیاند کە بەدخۆراکی و برسێتی هەروا ڕوولە لە زیادبوونە و بارودۆخی مرۆیی ناوچەکەش زۆر دڵتەزێنە هەندێک سەرچاوەی هەواڵ باسیان لەوە کردووە کە خەڵکی غەززە کە لە برسییەتی ڕەنج دەبەن ، ڕوویان لە خواردنی گژ و گیا کردووە. هەروەها سوپای زایونی ڕایگەیاندووە، ئیتر بۆ ناردنی یارمەتی مروڤ دۆستانە بۆ شاری غەززە شەڕ ڕاناگرن، بڕیارێک کە گروپە مرۆییەکان هۆشدارییان داوە، پێدەچێت برسێتی لە ناوچەکە زیاتر بکات.
