ئاماری نوێی کۆرۆنا لە هەرێمی کوردستان: 591 تووشبوو و 25 گیان لەدەستدان
ئاب 31, 2020 23:50 Asia/Tehran
وەزارەتی تەندروستیی هەرێمی کوردستان ڕایگەیاند لە 24 کاتژمێری ڕابردوودا 591 حاڵەتی نوێی تووشبوون بە کۆرۆنا لە هەرێمی کوردستان تۆمار کراوە و بەوەش کۆی حاڵەتەکانی تووشبوون گەیشتە 28 هەزار و 752 حاڵەت.
ڕۆژی دووشەمە 31ی ئابی 2020 وەزارەتی تەندروستیی هەرێمی کوردستان ئاماری 24 کاتژمێری رابردووی تایبەت بە پەتای کۆرۆنای بڵاوکردەوە و ئاشکرای کرد، لەو ماوەیەدا 591 کەسی دیکە تووشی کۆرۆنا بوون، هەروەها 25 کەس بەهۆیەوە گیانیان لەدەست داوە.
هەر بەپێی راگەیەندراوەکە زۆرترین پشکنینی کۆرۆنا لە دهۆک ئەنجامدراوە 2481، کە ئەنجامی 243 کەسیان پۆزەتیڤ بووە.
تا ئێستا لە هەرێمی کوردستان 28 هەزار و 752 کەس تووشی کۆرۆنا بوون، لەو ژمارەیەش 18 هەزار و 49ـیان چاکبوونەتەوە و هەزار و 74 کەسیشیان بەهۆی ڤایرۆسی کۆرۆناوە گیانیان لەدەستداوە.
