رۆحانی: ئاشتی و یەکڕیزی لەناوچەی کەونارای نەورۆز، خواست و داوای گەلانی موعتەدیل وعەداڵەت خوازە
سەرۆکی کۆماری ئیسلامیی ئێران لە پەیامی جیاجیادا هاتنی ساڵی تازەی١٣٩٦ی هەتاوی و جێژنی نەورۆزی لەسەرانی وڵاتانی ئەفغانستان، تاجیکستان، پاکستان، ئازەربایجان، تورکەمەنستان، ئەرمەنستان، تورکیا ، قەزاقستان، قرقیزستان،هیندستان وئۆزبەکستان پیرۆزبایی کرد.
بەپێی ڕاپۆری ماڵپەڕی ڕاگەیاندنی سەرۆک کۆماریی، حەسەن ڕۆحانی لە پەیامی جیاجیای خۆی بۆ سەرانی یانزە وڵاتی ناوچە ، کە نەورۆز دەکەن بەجێژن، بەئاماژە بەوەی کە نەورۆز، جوانترین جێژنی سروشتە کە بە تێپەڕاندنی وەرزی زستان و چوون بەرەو پیری بەهار، هیواو سەوزەڵانی و تازەبوونەوەی سروشت بەدیاری دێنێ، وتی: ئەو جێژنە، هێمای ئیعتدال، هێمنی، گەرمی، ڕووناکی، فراوانی و ناسکی و پاکییە، کە کردگار بەمرۆڤی دەبەخشێ.
رۆحانی، ئاشتی ویەکڕیزی لەناوچەی کەونارای نەورۆزی لە ویست و خواستی گەلانی موعتەدل ناوبردو وتی: جیهانی ئەمڕۆ زیاتر لەهەرکاتێکی دیکە، پێویستی بەهیوا و ئومێد هەیە کە بەهۆیەوە، ڕێز دەگیردری لە خۆشەویستی، ئەوین و دۆستایەتی و وڵاتان لەجیاتی بەرەوڕووبوونەوە، بانگهێشتی هاریکاری وتەعامول دەکات.
سەرۆک کۆمار وتیشی: نەتەوەکان بە هیوا، ئاشتی وهێمنی دەتوانن لەسای یەکڕیزی و تەعامول لەگەڵ یەکتردا، بەرەوڕووی ئەو سیما کرێت و ناحەزە ببنەوە کە هەڵقوڵاو و سەرچاوەگرتوو لە خراپ لەدین گەیشتن و توندڕەویی خوازی تایفییە کە ئەنجامەکەشی هاتنەدی تیرۆریزم و ڕەشەکوژییە.
رۆحانی لەکۆتایی پەیامەکەی بۆ سەرانی وڵاتانی ئەفغانستان، تاجیکستان، پاکستان، ئازەربایجان، تورکەمەنستان، ئەرمەنستان، تورکیا، قەزاقستان، قرقیزستان، هیندستان و ئۆزبەکستان ساڵێکی تژی لە شادمانی بۆ خەڵکی ئەو وڵاتانە بەئاوات خواست.