وتەبێژی حکومەتی ئێران : بایەخ بە هەڕەشەی ئەمریکا نادەین و پێداویستیەکانی ڤێنزۆئێلا دابین دەکەین
وتەبێژی حکومەتی ئێران بە ئاماژە بەوەی کە ڤێنزۆئێلا کاڵای بوێت، ئێران بۆی دابین دەکات، وتی: هەڕەشەکانی ئەمریکا کاریگەریی لە سەر بازرگانیی ئازادی ئێمە نابێت.
بە پێی ھەواڵێکی ئاژانسی مێھر ، عەلی ڕەبیعی سەبارەت بە درێژەی بازرگانیی ئازاد لەگەڵ ڤێنزۆئێلا، ڕایگەیاند: پەیوەندییە بازرگانییەکانی تاران و کاراکاس بە پێی یاسای نێودەوڵەتی و پێداویستیی دوو وڵات بە لەرچاوگرتنی هەموو هەلومەرجە دوولایەنەکان، لە داهاتوودا بە هەمان شێوە بەردەوام دەبێ و هەڕەشەکانی ئەمریکا هیچ کاریگەرییەکی لە سەر ئیرادەی ئێمە بۆ ئەنجامی بازرگانی ئازاد و یاسایی نێوان ئێمە نابێت.
ڕاشیگەیاند: ئەگەر ئامانجی یاسادانەری ئەمریکی کردنە ئامانجی پەیوەندییە ئابوورییەکانی ئێران لە گەڵ وڵاتانی لوبنان و سووریا بێت، نیشاندەری نائاگاییان لە پەیوەندیی قووڵی نێوان ئێمەیە. هەڵبەت ئەو هەوڵانە بەلای ئێمەوە تازە نین و ڕژیمی ئەمریکا ساڵانێکە کە هەوڵ دەدا لە رێگەی زەختی سەربازی، سیاسی و بشێوی ، گەلانی ناوچە لێک هەڵبڕێت و هەرچی جاریشە لەو هەوڵانەی شکست دێنێت.
ڕەبیعی هەروەها لەبارەی پەیوەندی ڕووسیا و ئێران لە بواری نێودەوڵەتی و بە تایبەت لە دۆسیەگەلێکی وەک بەرەنگاربوونەوەی تاکلایەنگەریی ئەمریکا و هاوکارانی لە دۆسیەی سووریا و ڕێککەوتنی ناڤۆکی، جەختی کردەوە: ئێمە لە باشترین سەردەمی پەیوەندیی مێژوویی ئێران و ڕووسیاداین و پەیوەندییەکانی ئێمە لە هەموو بوارەکانی هاوکاری ئابووری و ستراتژی بە خێرایی ڕوو لە پێشکەوتنە و پێکەوە توانیومانە پڕۆژەی پڕمەترسیی ئەمریکا و هاوپەیمانانی لە سووریادا بەرەوڕووی شکست بکەین.
.