وەزیری دەرەوەی کۆماری ئیسلامیی ئێران سەر لە بەیانی ئەمڕۆ هەینی لە پەیامێکی تویتەریدا سیاسەتی ئەمریکا بەرامبەر بە شەڕی یەمەنی بە نیشانەی ئەوەی زانی کە واشینگتۆن نەوتی بە لاوە بانتر و گرینگترە هەتا خوێنی مرۆڤەکان.

بە پێی ڕاپۆرتی ئیرنا؛ "محەممەد جەواد زەریف" بە ئاماژە بەوەی کە ئەمریکا تا پێش پەلاماری ئەمدواییەی فڕۆکە بێ فڕۆکەوانەکانی یەمەنی بۆ سەر دام و دەزگە نەوتییەکانی عەرەبستان، سیاسەتی بێدەنگە بەرامبەر بە قەیرانی یەمەنی گرتبووە پێش، رایگەیاند: خوێنی عەرەب لەهەمبەر نەوتی عەرەب، بنچینەی سیاسەتی ئەمریکایە.

زەریف لەم پەیامە  تویتەرییەدا نووسی: خوێنی عەرەب لەهەمبەر نەوتی عەرەب/ بنچینەی سیاسەتی ئەمریکا: ٤ ساڵ بۆردومانی بێ وچانی یەمەن، کوژرانی ١٠٠ هەزار یەمەن، برسێتیی ٢٠ ملوێن یەمەنی، تووش بوونی ٢.٣ ملوێن یەمەنی بە کولێرا = لەگەڵ چراسەوز بۆ جەنایەتکاران و ئەنجام دانی هەر جەنایەتێک بە ئازادی تەواو، بەڵام پەلاماری یەمەنییەکان بۆسەر هەممارە نەوتییەکان بۆ تۆڵە کردنەوە لە سەعوودییەکان = کردەوەی جەنگی قەبووڵ نەکراو.