ڕووداوەکانی جیهان لەسەد چرکەدا 2025-04-02 / پەلاماری ئەمڕۆ بەیانیی ڕژێمی زایۆنی بۆ سەر غەززە ١١ کوژراوی لێکەوتەوە
کاتی بڵاوبوونەوە: 13:30
01
پەلاماری ئەمڕۆ بەیانیی ڕژێمی زایۆنی بۆ سەر غەززە ١١ کوژراوی لێکەوتەوە
ژێدەرە پزشکییەکان ڕایانگەیاند؛ لە پەلامارە ئاسمانییەکەی سەرلەبەیانی ئەمڕۆی سوپای ئیسراییل بۆ سەر کەرتی غەززە ، ١١ فەلەستینی شەهید بوون. بە دەستپێبوونی شەپۆلی تازەی دەستدرێژییەکانی ڕژێمی زایۆنی بۆ سەر غەززە، تا ئێستا ١٠٢٤ کەس لەم کەرتە شەهید بوون و ٢٥٤٢ کەسیش بریندار بوون.
02
بزووتنەوەی ئەنساروڵڵا: پاپۆڕی فڕۆکەهەڵگری ئەمریکامان پێکاوە
یەحیا سەریع وتەبێژی سوپای یەمەن ڕایگەیاند: هێزە یەمەنییەکان پاپۆڕی فڕۆکەهەڵگری ئەمریکایی "یو ئێس ئێس هەری ترۆمەن"ـیان لە کاتی تێپەڕینی لە دەریای سوور بە مووشەک و درۆن پێکاوە. سەریع وتیشی: ئەم هێرشە کە سێهەمین حاڵەتی لە ماوەی ٢٤ کاتژمێری ڕابردوودا بووە، بەشێکە لە ئۆپەراسیۆنی بەردەوامی ئێمە دژ بە بنکە و هێزەکانی دوژمن.
03
ڕووسیا هەڕەشە و گوڕەشەکانی ترەمپ دژ بە ئێرانی شەرمەزار کرد
جێگری وەزیری دەرەوەی ڕووسیا لە لێدوانێکدا بە ئاماژە بە قسەکانی سەرۆک کۆماری ئەمریکا لەبارەی پەلاماری شیمانەیی بۆ سەر ئێران پێیداگرت: ئێمە ئەم هەڕەشە و گوڕەشە و ئولتیماتۆمانەی دۆناڵد ترەمپ دژ بە ئێران شەرمەزار دەکەین. سێرگەیی ڕیابکۆف وتیشی: ئەم ستراتیژییەی سەرۆک کۆماری ئەمریکا تەنیا دەبێتە هۆی ئاڵۆزکاوتربوونی ڕەوشەکە.
04
فۆندێرلاین: باجە گومرکییەکانی ترەمپ بێ وەڵام ناهێڵینەوە
سەرۆکی کۆمسیۆنی ئەورووپا لە لێدوانێکدا لە پەرلەمانی ئەورووپا بە شێوەزارێکی توند و ڕاشکاوانە هێرشی کردە سەر سیاسەتەکانی باجی گومرکیی حکومەتی دۆناڵد ترەمپ و وشداریدا کە یەکێتی ئەورووپا بەرامبەر بەم کردەوە یەکلایەنانەی واشینگتۆن بێدەنگ و دەستەوەستاو نابێت. ئورسۆلا فۆندێرلاین ڕاشیگەیاند: ئێمە ئەم سیاسەتەی ترەمپ بە هەڵە دەزانین و هەموو توانامان بۆ بەرەنگاربوونەوەی ئەم سیاسەتەی ئەمریکا بەکار دێنین.
05
زلێنسکی: ئامادەین بۆ ئاگربڕێکی بێ مەرج
ڤۆلۆدیمێر زلێنسكی، سەرۆكی ئۆكراین ڕایگەیاند کە وڵاتەكەی ئامادەیە بۆ ئاگربڕێکی بێ مەرج لەگەڵ ڕووسیادا و پێشتریش ئەوەی نیشانداوە. ناوبراو داوای لە ئەمریكایش كرد سزای زیاتر بەسەر مۆسكۆدا بسەپێنێت و پێیداگرت: ڕۆژانە بەڵگەی پێشێلکارییەکانی ئاگربڕ دەخەینە بەردەستی واشینگتۆن".
