ئەمریکا هەموو ئەو داعشانەی ڕەگەزنامەی وڵاتەکەیان هەیە لە کوردانی سووریا وەرگرتۆتەوە
وەزارەتی دادی ئەمەریکا ڕایگەیاند 4 هاووڵاتیی دیکەی وڵاتەکەی کە بە تۆمەتی ئەندامێتی داعش لەلایەن کوردانی سووریاوە دەستگیر کرابوون وەرگیردراونەتەوە.
بەپێی هەواڵی کوردپرێس، گۆڤاری ستارز ئەند سترایپس بڵاوی کردەوە: وەزارەتی دادی ئەمەریکا ڕایگەیاندووە کە وڵاتەکەی 4 هاووڵاتیی دیکەی ئەمەریکای کە بە تۆمەتی ئەندام بوون لە ڕیزەکانی داعشدا لە ناوچەی ژێر کونترۆڵی کوردانی سووریا دەستگیر کراون وەرگرتووە و ئێستا ئەمریکا هەموو داعشەکانی کە ڕەگەزنانەی ئەمریکییان هەیە لە کوردەکان وەرگرتۆتەوە.
وەزارەتی داد لە بەیاننامەیێکدا ڕایگەیاندووە ئەمریکا 25 هاووڵاتیی خۆی کە لە عێراق و سووریا بە تۆمەتی ئەندامێتی داعش دەستگیر کراون وەرگرتۆتەوە و 10 کەسیان منداڵن.
سێ هاووڵاتیی دیکەی ئەمریکی کە لە ڕیزەکانی داعشدان هێشتا لە عێراق و سووریان بەڵام دیار نییە کە لەلایەن هێزە کوردەکانەوە دەستگیر کرابن.
ئەمریکا داوای لە وڵاتانی ئەورووپی کردووە دەستگیرکراوانی داعش لە هێزە کوردەکانی سووریا وەربگرنەوە و هێزە کوردەکانی سووریاش چەندین جار ڕایانگەیاندووە ڕاگرتنی نزیکەی 10000 چەکداری داعش و 70000 لە ئەندامانی بنەماڵەکانیان لە توانایاندا نییە.
