ڕەئیسی: لە قۆناغی نوێدا پەیوەندییەکانی تاران و ئەنقەرە دەبێ فراوانتر بکرێت
سەرۆک کۆماری ئێرانی ئیسلامی پیرۆزبایی لە ڕەجەب تەیب ئەردۆغان کرد بە بۆنەی هەڵبژاردنی وەک سەرۆک کۆماری تورکیا و هیوای خۆی دەربڕی کە پەیوەندییە ئابووری، سیاسی، ئەمنی، فەرهەنگی و بازرگانییەکانی نێوان دوو وڵات لە سەردەمی نوێدا هێندەی تر فراوانتر ببێت.
بە پێی ڕاپۆرتی ئیرنا، سەیید ئیبراهیم ڕەئیسی، سەرۆک کۆماری ئێرانی ئیسلامی ڕۆژی سێشەممە لە وتووێژێکی تەلەفۆنی لەگەڵ ڕەجەب تەیب ئەردۆغان سەرۆک کۆماری تورکیا، پیرۆزبایی هەڵبژێردرانی وەک سەرۆک کۆماری ئەم وڵاتە لێکرد و خوازیاری خێراتر بوونی ڕەوتی هاوکاریی ناوچەیی ئێران و تورکیا بوو بە ئامانجی دەستەبەرکردنی بەرژەوەندییەکانی ھەردووک وڵات.
«ڕەجەب تەیب ئەردۆغان» سەرۆک کۆماری تورکیاش بە ناوی خۆی و خەڵکی وڵاتەکەی سوپاس و پێزانینی خۆی بۆ نیازپاکیی سەرۆک کۆماری ئێرانی ئیسلامی دەربڕی و وتی: لە قۆناغی داهاتوودا پرۆسەی فراوانکردنی پەیوەندییەکانی نێوان وڵاتەکەی و کۆماری ئیسلامیی ئێران لە بوارە جۆراوجۆرەکاندا بە هێز و شێلگیرییەکی زیاترەوە بەردەوام دەبێت.
