ئەمیرعەبدوڵاهیان: ئێران بەردەوام پشتیوانی دەکات لە ویست و خواستی خەڵکی یەمەن
وەزیری دەرەوەی ئێران لە دیداریدا لەگەڵ محەممەد عەبدوسەلام سەرۆکی شاندی دانوستانکاری حکومەتی ڕزگاری نیشتمانیی یەمەن لە تاران پێی داگرت: ئێران بەردەوام پشتیوانی دەکات لە ویست و خواستی خەڵکی یەمەن.
حسێن ئەمیرعەبدوڵاهیان لە دیداری سەرۆکی دانوستانکاری حکومەتی ڕزگاری نیشتمانیی یەمەن، بە دەربڕینی پشتیوانیی کۆماری ئیسلامیی ئێران لە پرۆسەی دامەزرانی ئاشتی لە یەمەندا و خۆشحاڵی دەربڕین لە ڕەوتی ڕوو لە پێشەوەی دانوستانەکانی نێوان یەمەن و عەرەبستان وتی: ئێران بەردەوام پشتیوانی دەکات لە ویست و خواستی خەڵکی یەمەن.
وەزیری دەرەوەی ئێران هەروەها لەم دیدارەدا ڕێز و سپاسی دەربڕی بەرامبەر بە هەڵوێستی بەهێز و لێهاتوووانەی بزووتنەوەی ئەنساروڵلای یەمەن سەبارەت بە پشتیوانی کردنی گەلی چەوساوی فەلەستین.
سەرۆکی دانوستانکاری حکومەتی ڕزگاری نیشتمانیی یەمەنیش لەم دیدارەدا ڕێزی گرت لە پشتیوانیی سیاسیی بەردەوامیی کۆماری ئیسلامیی ئێران لە بەرەی خۆڕاگری و وەزیری دەرەوەی ئێرانی ئاگادار کردەوە لە دوایین ڕووداوەکانی هاوپێوەند بە پرۆسەی ئاشتی لە یەمەندا.
محەممەد عەبدوسەلام دانوستانکاری حکومەتی ڕزگاری نیشتمانیی یەمەن پێشتریش لەگەڵ محەممەد باقر قاڵیباف سەرۆکی مەجلیسی شۆرای ئیسلامیی ئێران دیدار و وتوێژی کردووە.
