تێكچوونی هۆڕمۆناتی کچانی هەرزەکار و نیشانەکانی
دەکرێت ئاستی هۆرمۆنەکان لە هەرزەکاراندا بە بەردەوامی لە گۆڕانکاریدابێت، بەڵام جیاواز لە گۆڕانەکەی دەکرێت لە هەندێک کەسدا ڕێژەی ناهاوسەنگی هەبێت، ناهاوسەنگییەکەش یان بەرچاوە و پێی دەزانرێت یاخود شاراوەیە.
ئەوانەی بە شێوەیەکی ئاشکرا ناهاوسەنگی هۆڕمۆنیان هەیە دەکرێت سووڕی مانگانەیان دوابکەوێت یاخود کێشی جەستەیان زیاد بکات؛ لە کاتێکدا ئەوانی تر سووڕی مانگانەیان هەیە و هەست بە هیچ نامۆییەک ناکەن لە کاتێکدا کە ئاستی هۆڕمۆنەکانیشیان ناڕێکە.
ئەو هۆڕمۆنانەی پەیوەندیدارن بە دۆخەکەوە
- پرۆژیسترۆن: ئەم هۆڕمۆنە لەلایەن هێلکەدانەکانەوە بەرهەم دەهێنرێت و لە ماوەی هێلکەداناندا ڕێژەی دەردانی بەرزدەبێتەوە، کەمیی ئاستی ئەم هۆرمۆنە دەبێتە هۆی سەرئێشە و ناڕێکیی سووڕی مانگانە لەگەڵ شەکەتی، هەروەها پرۆژیسترۆن ڕۆڵێکی گەورەی هەیە لە جڵەوکردنی ڕێژەی ئیسترۆژیندا، واتە ئەگەر پرۆژیسترۆن نزم بوو، ئەوا ئیسترۆژینیش کێشە دروست دەکات.
- ئیسترۆژین: ناهاوسەنگی لە ئیسترۆژین کاریگەری دەبێت لەسەر زۆرینەی لایەنەکانی ژیانی خانمانی هەرزەکار؛ ڕێژەی بەرزی دەبێتە هۆی قەڵەوبوون، لەدەستدانی ئارەزووی جنسی (زایەندی) و بچووکیی مەمک، گۆڕانی زۆر لە هەوەس و سرووشتی کەسەکە. نزمی ڕێژەکەشی دەبێتە هۆی زۆر هەوکردنی میزەڕۆ، شەکەتی، ئازاری جەستە یاخود قورسی سەرنجدان.
- کۆرتیزۆل: یاخود پێی دەوترێت هۆرمۆنی فشار، بەرزی ڕێژەکەی دەبێتە هۆی نەخۆشیی کەشین و قەڵەوبوون، نیگەرانی یان خەمۆکی، نزمی ڕێژەکەشی دەبێتە هۆی نەخۆشی ئەدیسۆن و لاوازبوونی جەستە یاخود شەکەتبوون.
- هۆرمۆنەکانی سایرۆید: بەرزیی ڕێژەی هۆرمۆنەکانی ئەم ڕژێنە دەبنە هۆی لەدەستدانی کێش، پەرێشانی، ناڕێکی سووڕی مانگانە، داخورپینی دڵ، شەکەتی، نزمی ڕێژەکەشیان دەبێتە هۆی قەڵەوبوون، خەمۆکی، وشکبوونەوەی پێست و قژ، ناڕێکی سووڕی مانگانە.
- تیستێسترۆن: کچانی هەرزەکار دەکرێت ڕووبەڕووی کێشە ببنەوە بە بەرزبوونەوەی ڕێژەی ئەم هۆڕمۆنە نێرینەیە؛ وەک دەرکەوتنی مووی ڕەش لەسەر ڕووخسار و دروستبوونی زیبکە.
نیشانەکان
- ژمارەیەکی زۆر نیشانە هەن کە پەیوەندیدارن بە تێكچوونی هۆڕمۆنەوە؛ هەندێکیان گشتین وەک ئەمانە:
- ناڕێکی سووڕی مانگانە یان هەبوونی خوێنی زۆر
- شەکەتی و زیادبوونی کێشی جەستە
- دەرکەوتنی مووی زیادە
- گۆڕانکاری زۆر لە هەوەس و سرووشتی کەسەکە
هەندێک نیشانەی تریش هەن کە کەمتر گشتین؛ ئەوانیش ئەمانەن:
- زیادبوونی هەستیاری بە گەرمی و ساردی
- خڕبوونی ڕووخسار، وشکبوونەوەی پێست
- بەرزبوونەوە یان نزمبوونەوەی لێدانی دڵ
- قەڵەوبوون یان لاوازبوونی چاوەڕواننەکراو
- تینووێتی زۆر یان برسێتی زۆر، یاخود زۆر میزکردن
- شەکەتی ماسولکە، ئازار یان سڕبوونی ماسولکە و جومگەکان
- ئارەقکردنەوە، چاو کزبوون، سەرئێشە
- خەمۆکی، خەوزڕان
چارەسەر
شێوازی چارەسەرکردن بە گوێرەی هۆکار و ڕێژەی ناهاوسەنگیی هۆڕمۆنەکان دەگۆڕێت؛ لە زۆرینەی دۆخەکاندا بەکارهێنانی دەرمان و گۆڕانکاری لە شێوازی ژیانکردن هاوکاریی چاکبوونەوە دەکەن. ئەزموون کردنی گۆڕان و ناهاوسەنگی هۆڕمۆن لە هەرزەکاراندا بۆ هەردوو دایک و باوک و منداڵەکەش بێزارکەر و ماندووکەرە، بەڵام بە ئەنجامدانی پشکنینی گونجاو و ڕاوێژکردن بە پزیشک چارەسەری گونجاو دەدۆزرێتەوە.
