لە چین ، ھەر ژن و مێردێک بۆیان ھەیە سێ منداڵیان ھەبێ
چین بە گۆڕینی سیاسەتی حەشیمەتیی خۆی رایگەیاند : ھەر ژن و مێردێک دەتوانن سێ منداڵیان ھەبێ .
بە پێی راپۆرتی ھەواڵدەریی چین ، حکومەتی چین ئەمڕۆ دوشممە دوای ئەوەی کە ئاماری نوێ نیشانیدا ژماری دانیشتوانی ئەم وڵاتە رووی لە کەمی ناوە رایگەیاند : ھەر ژن و مێردێک دەتوانن تا سێ منداڵیان ھەبێ کە گۆڕانکاریەکی گەورەیە لە سیاسەتی بەرتەسکیی دوو منداڵی لەو وڵاتەدا .
ھەواڵدەریی فەرمیی چین ، شینھوا رایگەیاند : ئەم بڕیارە لە دانیشتنی کۆمیتەی ناوەندیی پارتی دەسەڵاتداری چین بە سەرۆکایەتیی شی جین پینگ سەرۆکی ئەم وڵاتە دراوە .
ساڵی 2016 ، چین سیاسەتی تاکە منداڵیی خۆی کە چەندین دەیە بۆ رێگرتن لە تەقینەوەی حەشیمەت گرتبوویە بەر ، راگرت و بەرتەسکیی منداڵداربوونی تا دوو منداڵ راگەیاند ، رێژەیەک کە نەیتوانی ببێتە ھۆی بەرزبوونەوەی پاوەجێی زاووزێ .
ئێستاکە ژماری دانیشتوانی چین یەک ملیار و 445 میلیۆن کەسە .
