ھەشت ساڵ بە سەر کۆمەڵکوژ کردنی ئێردییەکاندا تێ پەڕی
ئەمڕۆ یادی هەشت ساڵەی داگیرکردنی شەنگال و کۆمەڵکوژی و ژینۆسایدکردنی ئێزدییەکانە لە لایەن تاقمی تیرۆریستی داعشەوە.
ڕۆژی 3ی ئابی 2014 ڕێکخراوی تیرۆریستیی داعش، هێرشی کردە سەر شەنگال و کۆمەڵگەی ئێزدی، شارەکە داگیرکرا و ژمارەیەکی زۆر لە کوردانی ئێزدی ناچار بە هەڵاتن و چوونە سەر چیای شەنگال کران، ژمارەیەکی زۆریشیان بە دیل گیران و یان بێ سەروشوێن بوون.
لەگەڵ دەست گرتن بە سەر ئەم شارەدا تاقمی تیرۆریستی داعش خێرا دەستی کرد بە کۆمەڵکوژکردنی ئێزدییەکان و بەپێی ئامارە فەرمییەکان تەنها لە دوو ڕۆژی یەکەمی هێرشەکەدا نزیکەی 1900 ئێزدی کوژران و گیانیان لەدەست دا.
دوایین ئامارە ڕاگەیەندراوەکانی لایەنە فەرمییەکان وا دەر دەخەن کە، لەو داگیرکاری و ژینۆسایدکردنەی ئێزدییەکاندا، ئەوەی تا ئێستا تۆمارکراوە پێنج هەزار کەس گیانیان لەدەست دا، زیاتر لە 400 هەزار ئێزدی ئاوارەبوون، بەشێوەیەک کە نزیکەی 325 هەزار ئێزدی لە ناوخۆی هەرێمدا ئاوارەن، هەروەها نزیکەی 100 هەزار ئێزدی لە دەرەوەی وڵات پەنابەر و ئاوارەن.
لەو ژینۆساید و هەوڵی سڕینەوەیەدا، شەش هەزار و 500 ژن و منداڵی ئێزدی وەک کۆیلە و کەنیز لەلایەن داعشەوە گیران و بە گشتی نزیکەی 6400 کوردی ئێزدی ڕفێندران کە تا ئێستا دوو هەزار و 717 کەسیان بێسەروشوێنن ، هەروەها تائێستا ژمارەی ئەو ڕفێندراو و بەدیلگیراوانەی ئازادکراون بەمجۆرەن، دوو هەزار و هەشت منداڵ، هەزار و 207 ژن و 339 پیاو ئازادکراون.
بەهۆی ڕووداوەکەوە، هەزار و 759 منداڵ بێ باوک، 407 منداڵ بێ دایک و 359 منداڵ بێ دایک و باوک بوون، هەروەها تا ئێستا ژمارەی گۆڕە بەکۆمەڵەکانی شەنگال کە دۆزراونەتەوە 82 گۆڕی بەکۆمەڵن.
