ئەندامێکی باڵای مەکتەب سیاسیی بزووتنەوەی حەماس وێڕای پێداگریی لەسەر درێژەی بەرەڤانیی ئەو بزووتنەوە لە خەڵکی فەلەستین وتی: توانای ئێمە بۆ درێژەدان بە شەڕ، زۆر زیاترە لەتوانای رژیمی زایۆنی و سەرزەوینەکەمان وەردەگرینەوە.

"موسا ئەبومەرزوق" یەکێ لە ئەندامانی مەکتەب سیاسیی بزووتنەوەی حەماس کە سەردانی مۆسکۆی کردووە، وتی: توانای ئێمە بۆ درێژەی شەڕ، زیاترە لە توانای سوپای زایۆنی، ئەگەرچی جبەخانەکانی ئەوان و چەکئامێرەکانی ئێمە، پێک ناگیرێن بەڵام ئێمە بۆ سەرزەوینەکەمان دەجەنگین و ئەوان نامۆن و ئێمە شەڕ دەکەین هەتا سەردەکەوین چونکە خەڵکانێکین کە ژیانمان پێ خۆشەو ژیانیش بێ ئازادی، بێ مانایەو خەڵکەکەمان شیاوی ئەو جۆرە ژیانەیەو باجەکەشی دەدەین.

ئەبومەرزوق لەبارەی ئیدیعای رژیمی زایۆنی لەمەڕ کوژرانی٧٥لەسەتی ئەندامانی حەماس وتی: رژیمی ئیسرائیل هەمیشە درۆ دەکاو هەوڵ دەدا ژماری شەهیدانمان زۆر زیاد پێشان بدا، هەتا بەم چەشنە بتوانێ سیمای سوپاکەی چاک بکاتەوە کە لەلایەن خۆڕاگریی فەلەستین، خەوشێندراوە، چونکە موقاوەمەی فەلەستین، لە ماوەی پێنج کاتژمێردا بە لێدانی زەبری کاری و قورس، هەرەسی هێنا بە لەشکری رژیمی زایۆنی کە ئیدیعای دەکرد، بەهێزترین لەشکرە.

ئەو ئەندامەی بالای حەماس وتی: ئێمە داکۆکی دەکەین لە گەڵاڵەی بەڕێوەچوونی هەڵبژاردنی ئازادی فەلەستین کە هەموو گەلەکەمان لەناوخۆ ودەرەوەی وڵات تێیدا بەشدار بن و ئەوان هەرکەس هەڵبژێرن، شەرعیەت بەو دەدەین و پێویستە خەڵک خۆیان بڕیاربدەن.