دەستبەکار بوونی یانزەھەمین خولی مەجلیسی شورای ئیسلامیی ئێران
یانزەھەمین خولی مەجلیسی شورای ئیسلامیی ئێران بە ئامادە بونی سەرۆک کۆمارو ٢٧٦ نوێنەری ھەڵبژێردراو سەرلەبەیانیی ئەمڕۆ چوارشەممە دەستبەکار بوو.
پاش جێگیربوونی دەستەی سەرۆکایەتیی بە تەمەن دیاریکراو لە شوێنی خۆیاندا، پەیامی حەزرەتی ئایەتوڵڵا عوزما خامەنەیی ڕێبەری مەزنی شۆڕشی ئیسلامی خوێندرایەوە.
«سەیید ڕەزا تەقەوی» سەرۆک، «سەیید موستەفا ئاقا میرسەلیم» جێگری سەرۆک، «ڕوحوڵڵا نەجابەت» سکرتێری یەکەم، و «موحسین فەتحی» سکرتێری دووھەم ئەندامانی دەستەی سەرۆکایەتیی تەمەندارانی مەجلیسن کە لەنێو بەتەمەنترین و گەنجترین ئەندامانی مەجلیسی یانزەھەم ھەڵبژێردراون.
لە درێژەی ڕێ و ڕەسمی دەستبەکار بوونی یانزەھەمین خولی مەجلیسی شورای ئیسلامیی ئێران، «حەسەن ڕۆحانی» سەرۆک کۆماری ئێرانی ئیسلامی وتارێکی پێشکەش کردو ئینجا ئاھەنگی سوێندخواردن و پەیمان بەستنی ھەڵبژێردراوان ئەنجامی گرت.
یانزەھەمین خولی ھەڵبژاردنی مەجلیسی شورای ئیسلامیی ئێران، بۆ دیاری کردنی ٢٩٠ نوێنەر لە ٢٠٨ ھەرێمی ھەڵبژاردن، بیست و یەکەمی فڤریە بە بەشداریی زیاتر لە ٢٤ ملوێن و ٥٠٠ ھەزار کەس لە کەسانی خاوەنی مەرجی دەنگدان لە سەرتاسەری ئێران بەڕێوەچوو.
سەرۆکی بنکەی بەڕێوەبرانی ڕێ و ڕەسمی دەستبەکار بوونی یانزەھەمین خولی مەجلیسی شورای ئیسلامیی ئێران ڕایگەیاند: ڕێ و ڕەسمی دەستبەکار بوونی خولی یانزەھەمی مەجلیسی شورای ئیسلامی ئەمڕۆ چوارشەممە بە پەیامی ڕێبەری مەزنی شۆڕشی ئیسلامی و بە ئامادە بوونی سەرۆک کۆماری ئێرانی ئیسلامی و بەبەشداریی ٢٧٦ نوێنەری ھەڵبژێردراو دەستی پێ دەکرێت.
«غوڵامڕەزا نووری» یاڕیدەری بەڕێوەبەرایەتیی مەجلیس و سەرۆکی بنکەی بەڕێوەبرانی ڕێ و ڕەسمی دەستبەکار بوونی یانزەھەمین خولی مەجلیسی شورای ئیسلامیی ئێران، وتیشی: دەستبەکار بوونی یانزەھەمین خولی مەجلیس لەگەڵ خولەکانی پێشوو جیاوازیی تایبەتیی ھەیە و ئەوەش بۆ ھەل و مەرجی تەندروستیی زاڵ بوو بە سەر کۆمەڵگادا دەگەڕێتەوە.
