بە چلەی ھاوین ، له‌هه‌ولێر باران بارین ده‌ستى پێکردو هه‌موو هه‌رێم ده‌گرێته‌وه
به‌گوێره‌ى پێشبینیه‌کان، به‌هۆى ئه‌و شه‌پۆلى بارانه‌ى له تورکیاوە ڕووى له ھەرێمی کوردستان کردوه، باران له‌سه‌رجه‌م شاره‌کانى هه‌رێم ده‌بارێت‌و ئێستاش له‌هه‌ولێر ده‌ستى پێکردوه، به‌ڕێوه‌به‌رایه‌تى که‌شناسى‌و بومه‌له‌رزه‌زانیی هه‌رێمیش ڕایده‌گه‌یه‌نێت، "له‌ناو سه‌نته‌رى شاره‌کان سه‌ربارى بارانبارین پله‌کانى گه‌رما دانابه‌زن".
به‌گوێره‌ى ئه‌و زانیاریانه‌ى به‌ڕێوه‌به‌رایه‌تى که‌شناسى‌و بومه‌له‌رزه‌زانیی هه‌رێم ئاشکرایکردوه، شه‌پۆلێکى بارانبارین له تورکیاوە ڕووى له ھەرێمی کوردستان کردوه‌و به‌و هۆیه‌شه‌وه ماوه‌ى دوو ڕۆژ ئه‌و بارانه به‌رده‌وامده‌بێت.
ئه‌وه‌شى باسکردوه، له‌مڕۆوه بارانبارین له‌شاره‌کانى هه‌رێم ده‌ستى پێکردوه‌و تاوه‌کو سبه‌ینێ یه‌کشه‌ممه به‌رده‌وامده‌بێت‌و سه‌ره‌تاى بارانبارینه‌که‌ش له‌هه‌ولێره‌وه ده‌ستى پێکردوه.
هه‌روه‌ک ئه‌وه‌ش ڕونکراوه‌ته‌وه، "پله‌کانى گه‌رما له‌نێوان 4 بۆ 5 پله له‌ناوچه شاخاویه‌کان دابه‌زیوه، به‌ڵام له‌ناو سه‌نته‌رى شاره‌کان پله‌کانى گه‌رما له41 پله بۆ 45 پله به‌جێگیریی ده‌مێننه‌وه‌و دانابه‌زن، له‌چیاکان بارانى به‌خوڕ ده‌بارێت، به‌ڵام له‌سه‌نته‌رى شاره‌کان نمه بارانى پچڕ پچڕ ده‌بێت".
