کاریگەرییەکانی وەرزی پاییز لەسەر پێست چییە ؟
وەرزی پایز دەناسرێتەوە بە جیاوازیەکی بەرفراوانی پلەی گەرمی لە نێوان شەو و ڕۆژدا، هەروەها ڕەوتی هەوای سارد و وشک، ئەم ڕەوتی هەوا سارد و وشکە کێشەی زۆرمان بۆ دروست دەکەن، لەوانە وشکبوونی پێست، ئەگەر ئاگاداری نەبین ڕەنگە تووشی قڵیشان ببێت و پێستەکەی هەڵبدات.
دکتۆر سەرگوڵ پسپۆری نەخۆشیەکانی پێست و جوانکاری گرنگترین ئەو کێشانە دەخاتەڕوو کە لەم وەرزەدا تووشی پێست دەبێت، ئەوانیش بریتین:
- وشک بوونی پێست بەهۆی کەمبوونی ڕادەی شێ لە هەوادا کە دەبێتە ھۆی دروستبوونی توێشکی سپی لەسەر پێست و خوران و سووربوونەوەی پێست.
- سەرهەڵدانەوە و خراپ بوونی ئێکزیما لەو کەسانەی ئێکزیمایان هەیە بە تایبەتی لە منداڵان.
- ئەو کەسانەی نەخۆشی گوڵیان هەیە بارودۆخییان خراپ دەبێت، بەهۆی گۆرانی گەرمی و ساردی و زیاتر خواردنی کافایین لەم وەرزەدا.
- ئەوانەی ئێکزیمای چەوریان هەیە لەم وەرزەدا خراپتر دەبن و تووشی توێشکی و سووربوونەوە دەبن لە ناو سەر و سەر برۆ و لای کەپوو و سینگیان.
- هەندێک نەخۆشی تر هەیە کە لە هاوین بەرەو باشی دەچن ،بەهۆی کاریگەری تیشکی خۆر لەوانەیە لەم وەرزەدا خراپتر بن، بۆ نمونە نەخۆشی سەدەفییە.
بۆ خۆپارێزی و کەمکردنەوەی کاریگەری ئەم وەرزە لەسەر پێستمان باشترین شت کەمکردنەوەی ماوەی خۆ شوشتن و دوورکەوتنەوە لە بەکارھێنانی ئاوی گەرم و لیفکە، هەروەها زۆر گرنگە کە کرێمە شێدارکەرەوەکان بەشێوەیەکی رۆژانە و رێکوپێکی بەکاربهێنین.
هەروەها پێویستە ڕۆژانە بڕێکی پێویست ئاو بخورێتە، چونکە زۆربەمان ئاو خواردنەوە لەبیر دەکەین لە وەرزی پایز یان زستاندا ئەم بڕەش ڕۆژانە کەمتر نەبێت لە دوو لیتر.
