دڵەکزێ؛ گەڕانەوەی ترشەڵۆکی گەدە بۆ سورێنچک
دڵەکزێ بریتییە لە هەستکردن بە سووتانەوە لە ناوچەی سنگدا. گەڕانەوەی ترشەڵۆکی گەدە بۆ سورێنچک، حاڵەتێکە کە بەهۆی ماسولکەیەک کە زیاتر لە باری ئاسایی خۆی خاوبوونەوەی ڕوودەدات، دروست دەبێت.
هۆکاری دڵەکزێ چیە؟
بۆ ئەوەی لە چۆنیەتی ڕوودانی دڵەکزێ تێبگەیت، پێویستە سەرەتا لە چۆنیەتی کارکردنی سورێنچک و گەدە تێبگەیت. دڵەکزێ کاتێک ڕوودەدات کە ترشێتی گەدە دەگەڕێتەوە ناو سورێنچک (ئەو بۆرییەی کە خواردن لە دەمەوە بۆ گەدە دەگوازێتەوە). بە شێوەیەکی ئاسایی کاتێک مرۆڤ خواردن دەخوات، بە سورێنچکدا تێپەڕ دەبێت بەشی خوارەوەی سورێنچک لە زمانەکان پێکهاتووە لە کاتی خواردندا ئەم زمانانە دەکرێنەوە تاکوو ڕێگە بە خواردنە و خواردنەوەکان بدات بۆ گەدە بگوازرێنەوە. دواتر زمانەکان دادەخرێنەوە تاکوو ڕێگە لە گەڕانەوەی ترشەڵۆکی گەدە بگرێت. لە کاتی هەرسکردنی خۆراکدا ترشەڵۆکی گەدە لە تێکشکاندنی خۆراکدا بەشدار دەبێت، بەڵام کاتێک ئەم زمانانەی بەشی خوارەوەی سورێنچک داناخرێنەوە ئەم ترشەڵۆکەی ناو گەدە دەگەڕێتەوە بەشی سەرەوەی سورێنچک و دەبێتە هۆی دڵەکزێ.
هەندێک خواردن و خواردنەوە دەبنە هۆی دڵەکزێ کە بریتین لە:
خواردنە توونەکان
پیاز
خواردنە ترشەمەنییەکان
تەماتە و بەرهەمەکانی وەک کەچەپ
خواردنی چەور و سوورەکراو
نەعنا
هەروەها کێشی زۆر و لە ئافرەتانی دووگیانیشدا ئەم حاڵەتە زۆر دەبێت.
هەندێک دەرمانی دژە هەوکردنەکان وەک ئەسپرین.
جگەرە کێشان
هەبوونی فشارێکی زۆر
نیشانەکان دڵەکزێ
هەستکردن بە سووتانەوە لە ناوچەی سنگدا هێڵنجدان و ڕشانەوە. سووتانەوەی گەدە. ناخۆشی بۆنی دەم. ئازار لەکاتی خواردنی چا، قاوە، تەماتە، خواردنی چەور، بەهارات، نەعنا... هەستکردن بە گرێ لە قوڕگ. ناڕێکی لە هەناسەدان.
چارەسەریی دڵەکزێ
زۆرجار دڵەکزێ دەکرێت لە ماڵەوە چارەسەر بکرێت، وەک گۆڕینی شێوازی ژیان و کەمکردنەوەی ئەو هۆکارانەی دەبنە هۆی ڕوودانی ئەم حاڵەتە.
پێش خەوتن نان مەخۆ: نان خواردن سێ بۆ چوار کاتژمێر پێش خەوتن وا دەکات گەدە بە بەتاڵی بمێنێتەوە و ئەگەری ڕوودانی دڵەکزێ کەم دەکاتەوە.
خۆت لە نان خواردنی زۆر بە دوور بگرە: دەتوانیت چوار بۆ پێنج جار لە ڕۆژێکدا نان بخۆیت لەجیاتی خواردنی خواردنێکی زۆر لە سێ ژەمدا.
لەبەرکردنی جلوبەرگی تەسک زۆرجار دەبێتە هۆی ڕوودانی دڵەکزێ. بەکارنەهێنانی قایشی توند و لەبەرکردنی جلوبەرگی فراوان دەکرێت ڕوودانی ئەم حاڵەتە کەم بکاتەوە.
بەپەلە نان خواردن دەکرێت هۆکار بێت بۆ ڕوودانی دڵەکزێ.
خەوتن لەسەر لای چەپ: ئەم جۆرە خەوتنە یارمەتی هەرسکردنی خۆراک و لابردنی ترشەڵۆکی گەدە و سورێنچک بە شێوەیەکی خێرا دەدات. لە کاتی نووستن با سەرت و سنگ لە ئاستی قاچەکانت بەرزتر بن. باشترە ئەنجامدانی ڕاهێنانەکان بەلایەنی کەم دوو کاتژمێر دوای نان خواردن بن. هەروەها خواردنەوەی بڕێکی کەم لە ئاو پێش ئەنجامدانی ڕاهێنان یارمەتی هەرسکردنی خۆراک و ڕێگریکردن لە وشکبوونەوە دەدات.
