داخوازی مافەوانانی بەریتانی لە حکومەتی لەندەن سەبارەت بە راگرتنی هەناردەی چەک بۆ ئیسراییل
زیاتر لە شەشسەد دادوەر، یاسازان و مامۆستای کۆلیژی ماف و مافەوانی لە زانکۆکانی بەریتانیا داوایان لە سەرۆک وەزیرانی ئەم وڵاتە کرد تا بە راگرتنی ناردنی چەک بۆ ڕژێمی ئیسراییل، پێش بگرێ بە ژینۆسایدکرانی خەڵکی غەززە بە دەستی ئەم ڕژێمەوە.
سەرباری داخوازەکانی خەڵکی ئاسایی و مافەوانانی بەریتانیا لە حکومەتی ئەم وڵاتە لەبارەی راگرتنی ناردنی بۆمب و چەکئامێر بۆ ئیسراییل، حکومەتی بەریتانیا ڕایگەیاندووە هیچ شتێک لە پلانی هەناردەکردنی چەک و کەرەستەی جەنگی بۆ ئیسراییل ناگۆڕێت.
مافەوانانی بەریتانی لە نامەکەیاندا بۆ حکومەتی بەریتانیا ڕەوشی غەززەیان بە کارەساتبار وەسف کرد و ئاماژەیان دا بەوەش کە حکومەتی بەریتانیا دەبێ بە کۆتایی هێنان بە ناردنی چەک و کەرەستەی جەنگی بۆ ئیسراییل، خۆی لەم جەنایەتە دوور بخاتەوە.
لەم نامە حەڤدە لاپەڕەییەدا هاتووە؛ حکومەتی بەریتانیا بە بەردەوامکردنی ناردنی چەک و کەرەستەی جەنگی بۆ ئیسراییل و بڕینی یارمەتییەکانی بە ئاژانسی فریاگوزاری و کاردیتنەوەی نەتەوە یەکگرتووەکان تایبەت بە ئاوارە فەلەستینییەکان کە بە ئانڕوا ناسراوە، بەڵێن و ئەستۆگرییە نێودەوڵەتییەکانی بنپێ دەکات.
