ڕەوانە کرانی چوارەمین دەستەی وەرزشوانانی نابیسا بۆ ئۆلەمپیکی برازیل
چوارەمین دەستەی کاروانی وەرزشیی نابیسایانی ئێران بەرەو ئۆلەمپیکی ٢٠٢٢ ی برازیل وەڕێ کەوتن.
یارییەکانی ئۆلەمپیکی نابیسایانی برازیل، لە ١١ی بانەمەڕەوە دەستی پێکراوەو ھەتا ٢٥ی ھەر ئەم مانگەش بەردەوام دەبێت و کاروانی «دەنگ»ی ئێران بە دروشمی «سەرکەوتن لە بێ دەنگی دا» بە ١٤٠ کەسەوە لە بوارەکانی تۆپی پێ، باڵەی کەناراوی، جۆدۆ، زۆرانی ئازادو فەرەنگی، ڕاکردنی مەیدانی، تیرھاویشتنی پیاوان و ئافرەتان، کاراتەی پیاوان و ئافرەتان و تێکواندۆی پیاوان و ئافرەتان بەشداریی یارییەکان دەکەن.
تیپەکانی نیشتیمانیی تێکواندۆی پیاوان و ئافرەتان ھاوڕێ لەگەڵ وەرزشوانانی نابیسای ڕاکردنی مەیدانی، ڕۆژی سێ شەممە بۆ بەشداری لە بیست و چوارەمین خولی ئۆلەمپیکی ھاوینەی نابیسایان تارانیان بەرەو برازیل بەجێ ھێڵا.
کاروانی وەرزشیی ئێران لە برازیل ھەتا ئێستا لە بواری کاراتە توانیویەتی چوار میدالیای برۆنز لە کێبەرکێکان بەدەست بێنێ.
