فراکسیۆنی گۆڕان جارێکی دیکە داوای کشانەوەی حزبەکەی لە دەسەڵات دەکات
فراکسیۆنی گۆڕان لە بەغدا جارێکی دیکە نامەیەکی دەگەیەننە رێکخەری گشتیی بزووتنەوەی گۆڕان و ئەندامانی فراکسیۆنەکە داوای کشانەوەی حزبەکەیان لە دەسەڵاتی حکوومەتی هەرێم دەکەن.
بەپێی هەواڵی کوردپرێس، فراکسیۆنی گۆڕان بە عومەر سەید عەلی رێکخەری گشتیی بزووتنەوەکە دەڵێت: جەنابتان باش دەزانن ناکۆکیی سەرەکی نێوان ئێمە و ئێوە لەسەر جۆری بەشداری و مانەوەتانە لەم کابینە و دەسەڵاتەدا. هۆکاری ناکۆکیمان ئەوەیە، ئێوە بە پێچەوانەی بەڵێنی خۆتان کە ماوەی شەش مانگ و پاشان ساڵێکتان دیاری کرد بۆ چاکسازی، کەچی لەبری چاکسازی مووچەی خەڵک بڕدرا و ئێوە لەبری کشانەوە بەڵێنەکەی خۆتان شکاند و هێشتا ماونەتەوە لە دەسەڵاتدا.
لە نامەکەدا هەروەها هاتووە: داواتان لێدەکەین لە دەسەڵات بکشێنەوە و پشت بکەنە کورسی و دەستکەوتی ماددی و رووبکەنە خەڵک و شەقام، داواش دەکەن بەشداربن لە هاوپەیمانێتییێکی دەرەوەی دەسەڵات بۆ بەشداری کردن لە هەڵبژاردنی عێراق.
فراکسیۆنەکەی گۆڕان دەڵێن: ئەگەر ئەو بڕیارە بدەن ئێمە هاوکارتان دەبین تا ئاستی وازهێنان لە خولی ئێستای پەرلەمان و خۆکاندیدنەکردنەوە بۆ خولی داهاتووی پەرلەمان.
فراکسیۆنی گۆڕان لە بەغدا چاوەڕوان دەکات لە ماوەی دوو رۆژدا رێکخەری گشتیی بزووتنەوەی گۆڕان وەڵامی نامەکەیان بداتەوە.
