کۆبوونەوەی نێوان سه‌رۆکى هه‌رێمى کوردستان و وه‌زیرى ده‌ره‌وه‌ى لوکسه‌مبۆرگ
سه‌رۆکى هه‌رێمى کوردستان له‌گه‌ڵ وه‌زیرى ده‌ره‌وه‌ى لوکسه‌مبۆرگ کۆبووه‌وه و رایگه‌یاند، کلیلى ئارامى و سه‌قامگیریى عێراق، چاره‌سه‌کردنى کێشه‌کانى نێوان هه‌رێمى کوردستان و حکوومه‌تى فیدرالیى عیراقه و هه‌ردوولا ده‌بێ به گفتوگۆ و له‌سه‌ر بنه‌ماى ده‌ستوور، ڕێگه‌چاره بۆ نه‌هێشتنى کێشه‌کان بدۆزنه‌وه.
به‌پێی راگه‌یه‌ندراوێکی سه‌رۆکایه‌تی هه‌رێمی کوردستان، به‌یانیى ئه‌مڕۆ چوارشه‌ممه «نێچیرڤان بارزانى»، سه‌رۆکى هه‌رێمى کوردستان، پێشوازى له «ژان ئه‌سیلبۆرن» وه‌زیرى ده‌ره‌وه‌ى لوکسه‌مبۆرگ کرد و له کۆبونه‌وه‌یه‌کدا دوایین پێشهاته‌کانى دۆخى سیاسیى عیراق له سه‌روبه‌ندى دانیشتنى ئه‌مڕۆى ئه‌نجومه‌نى نوێنه‌ران، په‌یوه‌ندییه‌کانى هه‌ولێر ـ به‌غدا و گفتوگۆى چاره‌سه‌رکردنى کێشه‌کانیان، دۆخى ئێزدییان و ناوچه‌ى شه‌نگال و پێکهاته‌کان له ده‌شتى نه‌ینه‌وا و دۆخى ئاواره و په‌نابه‌ران له هه‌رێمى کوردستان، تاوتوێ کران.
لەباره‌ى کێشه‌کانى هه‌ولێر ـ به‌غداش، «نێچیرڤان بارزانى» دوپاتی کرده‌وه، که "کلیلى ئارامى و سه‌قامگیریى عێراق، چاره‌سه‌کردنى کێشه‌کانى نێوان هه‌رێمى کوردستان و حکومه‌تى فیدرالیى عێراقه و هه‌ردولا ده‌بێ به گفتوگۆ و له‌سه‌ر بنه‌ماى ده‌ستور، ڕێگه‌چاره بۆ نه‌هێشتنى کێشه‌کان بدۆزنه‌وه.
لاى خۆیه‌وه وه‌زیرى ده‌ره‌وه‌ى لوکسه‌مبۆرگیش، وێڕاى ئاماژه‌دان به سه‌ختى و گرفتەکانى سه‌رده‌مى شه‌ڕى دژى داعش له هه‌رێمى کوردستان، پشتگیرى وڵاته‌که‌ى له‌گه‌ڵ وڵاتانى ئه‌وروپا بۆ هه‌رێمى کوردستان و بایه‌خدانى وڵاته‌که‌ى به پرسى پێکهاته‌کان و دۆخى ئێزدییان به‌تایبه‌تى دوپاتکرده‌وه و باسى له پلانى خۆى بۆ سه‌ردانى که‌مپه‌کانیان کرد.
