نێچیرڤان بارزانی و شاندێکى ئه‌ندامانى سه‌ربه‌خۆى ئه‌نجومه‌نى نوێنه‌رانى عێراق کۆبوونەوە
سه‌رۆکى هه‌رێمى کوردستان له‌گه‌ڵ شاندێکى ئه‌ندامانى سه‌ربه‌خۆى ئه‌نجومه‌نى نوێنه‌رانى عێراق کۆبووه‌وه.
به‌پێی راگه‌یه‌نراوێکی سه‌رۆکایه‌تی هه‌رێمی کوردستان، نێچیرڤان بارزانى پێشوازیى له شاندێکى ئه‌ندامانى سه‌ربه‌خۆى ئه‌نجومه‌نى نوێنه‌رانى عێراق کرد که وه‌ک لیژنه‌ى گفتوگۆ ده‌ناسرێن، له دیدارێکدا دوایین پێشهاته‌کانى دۆخى سیاسیى عێراق، ته‌حه‌دییه‌کانى به‌رده‌مى و هه‌وڵه‌کان بۆ لێکگه‌یشتنى نێوان لایه‌نه سیاسییه‌کان و ده‌رچوون له چه‌قبه‌ستویى و بنبه‌ستى سیاسى، تاوتوێ کران.
ئاماژه‌ی به‌وه‌ش کرد، شانده‌که بە مه‌به‌ستى سه‌ردانیان بۆ هه‌رێمى کوردستان خسته‌ڕوو، که ده‌یانه‌وێ له‌گه‌ڵ سه‌رۆکایه‌تیى هه‌رێمى کوردستان و لایه‌نه سیاسییه‌کان دیدار و گفتوگۆ ئه‌نجام بده‌ن بە مەبەستی لێکنزیک کردنه‌وه‌ى لایه‌نه سیاسییه‌کان و دۆزینه‌وه‌ى ده‌رچه‌یه‌ک بۆ ده‌رچوون له بنبه‌ستى سیاسى له عێراق.
له‌راگه‌یه‌ندراوه‌که‌دا هاتووه، نێچیرڤان بارزانى، پشتگیرى بۆ هه‌وڵه‌کانیان و هه‌مو هه‌وڵ و هه‌نگاوێک دووپات کرده‌وه که کار بۆ لێکنزیککردنه‌وه‌ى لایه‌نه سیاسییه‌کان و تێپه‌ڕاندنى کێشه و سه‌ختییه‌کانى به‌رده‌م پرۆسه‌ى سیاسى له عێراق بکات و هیواى خواست ئه‌نجامێکى باش له هه‌وڵه‌کانیان بکه‌وێته‌وه.
