ئەمساڵ دینارێکی نەوت و داهاتی ناوخۆ بۆ موچە خەرج نەکراوە
بڕیارده‌ری ڕه‌وتی هه‌ڵوێستی نیشتیمانی له په‌یامێکدا بۆ مه‌سرور بارزانی و قوباد تاڵه‌بانی ڕایگه‌یاند، عێراق ئەمڕۆ 761 ملیار دینارەکە دەدات بۆ موچەی مانگی 10، وەریبگرن، بە داهاتی نەوت و ناوخۆ نزیکەی 261 ملیار دیناری دیکە بخەنەسەری.
عه‌لی حه‌مه‌ساڵح وتیشی: "بەدرێژایی ئەم ساڵ دینارێکی نەوت و داهاتی ناوخۆ بۆ موچە خەرجنەکراوە".
ناوبراو له هه‌ژماری تایبه‌تی خۆی په‌یامێکی ئاڕاسته‌ی مەسرور بارزانی و قوباد تاڵەبانی کردوه وده‌ڵێت: به‌غدا "20 ڕۆژی دیکە سێیەم 761 ملیاری دیناری دەدات، ئەویش نزیکەی 231 ملیاری دەوێت بۆ تەواوکردنی موچەی سێیەم، ساڵەهای ساڵە ملیارەها دۆلاری خەڵک دەبەن!، بەدرێژایی ئەم ساڵ دینارێکی نەوت و داهاتی ناوخۆ بۆ موچە خەرجنەکراوە!".
شایانی باسە زیاتر له 50 رۆژه موچه‌خۆرانی هه‌رێمی کوردستان موچه‌یان وه‌رنه‌گرتووه و تائێستا موچه‌ی مانگی (تشرینی یه‌که‌م/10)ی ئه‌مساڵ دابه‌ش نه‌کراوه، هێشتا هیچ واده‌یه‌کی فه‌رمی له‌لایه‌ن وه‌زاره‌تی دارایی و ئابورییه‌وه ڕانه‌گه‌یه‌نراوه.
