سەرۆکی عێراق خوازیاری لێکۆڵینەوە لە بارەی ئەنجامدەرانی پەلاماری سەر خەڵک و هێزە ئاسیاشیەکان بوو
بەرهەم ساڵح سەرۆکی عێراق شەوی رابردوو لە دیداری سەرۆکی پەرلەمان و فایەق زەیدان سەرۆکی ئەنجوومەنی باڵای دادڤانیی ئەم وڵاتە خوازیاری لێکۆڵینەوەی خێرا بوو لە بارەی ئەنجامدەرانی پەلاماری سەر خەڵک و هێزە ئاسایشیەکان .
بەمەبەستی تاوتوێکردنی بەگژاچونەوەی گەندەڵی و پێویستی پارێزگاریکردن لە رۆژنامەنوسان، سەرۆک کۆمار ی عێراق. پێشوازیکرد لە سەرۆکی ئەنجومەنی نوێنەران و ئەنجومەنی باڵای دادوەری.
بەرهەم ساڵح، سەرۆک کۆماری عێراق ئێوارەی یەک شەممە 6ی تشرینی یەکەم، لە بەغدا پێشوازیکرد لە محەمەد حەلبوسی، سەرۆکی ئەنجومەنی نوێنەران عێراق و فایەق زەیدان، سەرۆکی ئەنجومەنی باڵای دادوەری، لە کۆبونەوەکەشدا سەبارەت بە دوایین پێشهاتە سیاسی و ئەمنییەکانی عێراق گفتوگۆ کرا.
لە دیدارەکەدا، جەختکرایەوە لەسەر پارێزگاری ئاسایشی کۆمەڵایەتی و بەدواداچونی رێوشوێنەکانی لێکۆڵینەوە بۆ دۆزینەوەی ئەو کەسانەی دەستیان لە توندوتیژییەکاندا هەبوە بەرامبەر بە خۆپیشاندەران و هێزە ئەمنییەکان، هاوکات گرنگی پاراستنی سەروەری یاسا و پارێزگاری لە گیانی هاوڵاتیان و دامەزراوە تایبەتی و گشتییەکان دوپاتکرایەوە.
هەر لە دیدارەکەدا، گفتوگۆکرا لە سەر دۆسیەی بەگژداچونەوەی گەندەڵی و پێویستی پەلەکردن لە گرتنەبەری رێوشوێنی پێویست بۆ بەهێزکردنی دادوەری لە بە گژداچونەوەی گەندەڵی و لێپێچینەوە لەو تۆمەتبارانەی کە توندوتیژییان ئەنجام داوە.
لە هەمانکاتدا سەبارەت بە پێویستیی کردنەوەی دۆسیەی لێکۆڵینەوە لەو دەستدرێژیانەی کە لەلایەن کەسانی نەناسراوەوە کرایە سەر بەشێک لە میدیا و رۆژنامەنوسان جەختکرایەوە و باس کرا لەسەر پارێزگاریکردن لە دەزگاکانی راگەیاندن و ئازادی رادەربڕین کە لە دەستوردا پارێزراوە .
