"جومانە غەلای" وتەبێژی کۆمیسیۆنی باڵای هەڵبژاردنەکانی عێراق وتی کە هیچ بڕیارێک نەدراوە لەبارەی دواکەوتنی وادەی بانگەشە بۆ هەڵبژاردن و ئەو رەوتە لەکاتی دیاریکراودا، دەس پێ دەکرێ.

"جومانە غەلای" وتەبێژی کۆمیسیۆنی باڵای هەڵبژاردنەکانی عێراق وتی: "هەڵبژاردنەکان دواناخرێ، کۆمیسیۆن لەهەوڵی جێبەجێ کردنی کاروباری پێویستە لەوبارەوەو هەنگاوی زۆریشی هەڵگرتووە، ئامادەی بەڕێوەبردنی هەڵبژاردنەکانین لە کاتی دیاریکراوداو بەرنامەکانی کۆمیسیۆن ناگۆڕدرێ و هیچ پێشنیارێک لەمەڕ دواخرانی هەڵبژاردنەکان، لەبەردەم کۆمیسیاریای هەڵبژاردنەکاندا نیە.

جومانە غەلای لەبارەی دەسپێکرانی بانگەشەی هەڵبژاردنیش وتی: "بانگەشە بۆ هەڵبژاردن، بەپێی بەرنامە دەس پێ دەبێ و بێتوو ئەو پرۆسە دوابکەوێ، کاریگەریی نابێ لەسەر دواکەوتنی پرۆسەی هەڵبژاردن و دۆسییەی زیاتر لە٨٠٠ بەربژێرمان بۆ پشت ڕاست کرانەوەی لێهاتووییان لەڕێی وەزارەتی ناوخۆ خستووەتەبەردەست ئەنجومەنی وەزیران، ٢٠٠ ناوەندی دەنگدان لە هەرێمی کوردستان دادەمەزرێ و گەڵاڵەی ئاسایشیی ئەو ناوەندانە لەلایەن لێژنەی باڵای ئاسایشەوە ڕێک وپێک و ئامادە دەکرێ".

جومانە غەلای لەبارەی قۆناخەکانی دواتری کاری کۆمیسیۆنیش وتی: "هەنگاوی دواتر، تۆماری ناوی چاودێرانی هەڵبژاردنی ناوخۆ و دەرەوەی عێراق و نوێنەرانی پارت و لایەنە سیاسییەکان دەبێ".