بەڕێوەچوونی کۆنفرانسی کوردەکانی سوریا
کۆنفرانسی کوردەکانی سوریا بە بەشداری سەدان کەسایەتی لە پارکی ئازادی قامیشلۆ دەستی پێکرد.
کۆنفرانسی کوردی سوریا لە شاری قامیشلۆ بە خولەکێک بێدەنگی دەستی پێکرد و دواتر مەزلوم عەبدی فەرماندەی گشتی هێزەکانی سوریای دیموکراتیک وتارێکی پێشکەش کرد و وتی: ئەم کۆنفرانسە ڕێگە خۆش دەکات بۆ مافەکانی گەلی کورد لە سوریا. فەرماندەی هەسەدە وێڕای جەخت کردن لە سەر ئەوەی کە بانگەوازی عەبدوڵڵا ئۆجالان، ڕێبەری پەکەکە، بۆ پێشخستنی ئاشتی و دامەزراندنی کۆمەڵگایەکی دیموکراتیک لە تورکیا، ڕاستەوخۆ کاریگەری لەسەر ئارامی و سەقامگیری باکور و ڕۆژهەڵاتی سوریا هەیە، ڕایگەیاند کە ئامانجی سەرەکی ئەم کۆنفرانسە دەستەبەرکردنی مافەکانی گەلی کورد و سەرجەم نەتەوەکانە لە سوریای نوێدا. دوابەدوای ئەم کۆنفرانسە، کۆنفرانسی کوردی سوریا ئەندامانی دەستەی دادوەری پێکهاتوو لە "ئیلهام ئەحمەد"، "پەروین یوسف"، و "محەمەد ئیسماعیل" هەڵبژێردران .
