ئەمیر عەبدوڵڵاهیان: ڕژێمی زایۆنی هۆکاری تێرۆر و تێکدانی هەموو ناوچەکەیە
وەزیری دەرەوەی ئێران لە وتووێژێک دا لەگەڵ هاوشانه ئیماراتییەکەی ڕایگەیاند، بوونی ڕژێمی داگیرکەری قودس لە ناوچەکەدا ناسەقامگیری و نائەمنی لێکەوتووەتەوە و هۆکاری تیرۆر و تێکدانی هەموو ناوچەکەیە.
بە گوێرەی ڕاپۆرتی ئیرنا، ئێوارەی ڕۆژی یەکشەممە حسێن ئەمیر عەبدوڵڵاهیان وەزیری دەرەوەی ئێران لە گەڵ شێخ عەبدوڵڵا بن زاید وەزیری دەرەوەی ئیمارات وتووێژی کرد و تاوتوێی پرسە دووقۆڵی و ناوچەیی و نێودەوڵەتییەکانیان کرد.
ناوبراو بە ئاماژە بە ئەولەویەتی دراوسێکان لە سیاسەتی دەرەوەی کۆماری ئیسلامیی ئێران، جەختی لە زیادکردنی دیدار و ڕاوێژی دوو قۆڵی نێوان بەرپرسانی دوو وڵات کردەوە و بە بنەمایەک بۆ پەرەسەندن و فراوانکردنی پەیوەندییەکانی نێوان دوو وڵاتی زانی .
ئەمیر عەبدوڵڵاهیان گوتیشی: کۆماری ئیسلامی ئێران دەیەوێت ئاسایش و پێشکەوتن بۆ دراوسێکانی و ناوچەکە بپارێزێت و دەستێوەردان و بوونی بیانییەکان بە زیانی ئاسایشی ناوچەکە دەزانێت.
شێخ عەبدوڵڵا بن زاید ئال نەهیان وەزیری دەرەوەی ئیماراتیش پێشوازی لە ڕاوێژکارییە بەردەوامەکانی نێوان بەرپرسانی ئێران و ئیماراتی کرد و ئاماژەی بە بەرژەوەندی هاوبەشی دوو وڵات لە پەرەپێدانی پەیوەندییەکانی نێوان دوو وڵات کرد.
جەختیشی کردەوە کە ئیمارات رێگە بە هیچ کارێکی وێرانکەر نادات لە خاکەکەیەوە دژ بە وڵاتانی دراوسێی بکرێت و هەمیشە ئاسایشی دراوسێکانی لەبەرچاو دەگرێت.
