بە ھۆی لافاوەکە ، ئەمڕۆ لە ھەولێر پشووی فەرمیە
پارێزگای هه‌ولێر رایگه‌یاند، له‌به‌رئه‌وه‌ی له‌چه‌ند گه‌ڕه‌ک و شه‌قامیێکی گشتیی به‌هۆی پاشماوه‌ی لافاو ئاسته‌نگ له‌به‌رده‌م هاتوچۆی هاوڵاتییان دروستبووه و ڕێگای هاتوچۆ نه‌ماوه، ئەمڕۆ یه‌کشه‌ممه له‌سه‌رجه‌م ناوه‌نده‌کانی خوێندن و فه‌رمانگه حکومیه‌کان ده‌کرێته پشووی فه‌رمی.
له‌ڕاگه‌یه‌ندراوێکدا پارێزگای هه‌ولێر بڵاویکرده‌وه، "به‌هۆی ئه‌و شه‌پۆله به‌خوڕه‌ی باران و ته‌زره‌ی سنوری پارێزگای هه‌ولێری گرته‌وه و له چه‌ند شوێنێک لافاو هه‌ستا و هاتوچۆی هاوڵاتییان په‌کیکه‌وت، یه‌کشه‌ممه 31ی (تشرینی یه‌که‌م/10)ی 2021 به‌مه‌به‌ستی پاککردنه‌وه‌ی ئه‌م ڕێگایانه و ئاساییکردنه‌وه‌ی هاتوچۆی هاوڵاتییان، له‌سه‌رجه‌م دام و ده‌زگا و فه‌رمانگه‌کانی حکومی و قوتابخانه ئه‌هلی و حکومیه‌کان له سنوری پارێزگاکه‌مان پشووی فه‌رمییه.
ئه‌وه‌شی خسته‌ڕو، ئه‌و پشوه ته‌نها فه‌رمانگه خزمه‌تگوزارییه‌کان ناگرێته‌وه که له‌ئه‌رک داده‌بن بۆ ڕاماڵینی و پاککردنه‌وه‌ی ئه‌و شه‌قام و شوێنانه‌ی که به‌هۆی لافاوه‌وه دوچاری گرفتی هاتوچۆ هاتوون، له‌به‌رئه‌وه‌ی له‌چه‌ند گه‌ڕه‌ک و شه‌قامیێکی گشتیی به‌هۆی پاشماوه‌ی لافاو ئاسته‌نگ له‌به‌رده‌م هاتوچۆی هاوڵاتییان دروستبوه و ڕێگای هاتوچۆ نه‌ماوه.
به‌هۆی بارانبارینی به‌ڕێژه‌یه‌کی زۆر له‌شاری هه‌ولێر، له‌چه‌ند ناوچه‌یه‌کی ئه‌و شاره لافاو دروستبووه و تیمه‌کانی به‌رگری شارستانیش رایانگه‌یاندوه، له‌هه‌وڵدان بۆ که‌مکردنه‌وه‌ی زیانه‌کانی لافاو، تا ئێستاش هیچ زیانێکی گیانی لێنه‌که‌وتوه‌ته‌وه.
